Sii-hayaha Xilka Raysal-wasaarennimada Soomaaliya, Mudane C/waaxid Cilmi
Goonjeex, iyo Wasiirka Horumarinta Haweenka iyo Arrimaha Carruurta,
Marwo Fowsiya Maxamed Sheekh ayaa maanta ka qeybgalay xaflad
shahaadooyin lagu guddoonsiinayay ardey ka qalinjebisay Machadka
Horumarinta Haweenka ee Marxuumad Qamar oo ay maamusho wasaaradda
Horumarinta Haweenka iyo Daryeelka Qoyska.
Shahaadooyin ayaa la guddoonsiiyay 37 ardey oo dhameystay koorsooyin
kala ah 4 bilood oo barashada kumbuyuutar ah iyo 6 bilood oo lagu
baranayay maamulka iyo maareynta, iyadoo 35 ka mid ah ardeydaas ay hablo
yihiin. Waxbarashadu waxay gabdhahaas fursad u siin doontaa inay ka
shaqeeyaan xafiisyada, isla markaana ay ku-dayasho wanaagsan u noqdaan
gabdhaha kale.
Ardeyda Machadka dhigata wax lacag ah lagama qaado maadaama ay ka soo
jeedaan qoysas dhaqaalahoodu liito, waxayna isugu jiraan agoomo iyo qaar
ka yimid xeryaha dadka soo barakacay.
Marwo Fowsiya ayaa tiri:
“Maynan qiyaasi karin saameynta waxbarashadu ku yeelan doonto nolosha
ardeydan. Laakiin waxaan aragnay inay awood u leeyihiin inay ku
xoogsadaan si sharaf leh. Waxaan aaminsanahay in waxbarashadu tahay
habka ugu wanaagsan ee awood lagu siin karo gabdhaha”.
“Waa mas’uuliyad na saaran inaan gabdhaha siino waxbarasho tayo leh oo
lacag la’aan ah, taasoo ah howl weyn. Laakiin waxaa naga go’an inaan
sameyno wixii aan awoodno inkastoo ay jiraan duruufo dhaqaale.”
Sii-hayaha Raysal-wasaaraha ayaa isna yiri:
“Waxaan jecelahay inaan ka mahadceliyo howsha weyn ee ay qabatay
Wasaaradda Horumarinta Haweenka iyo Daryeelka Qoyska. Waxaan arkaa in
howsha aad haysaan ay isbeddel keeneyso, isla markaana ay awood-siineyso
haweenka oo beddeli kara nolosha qoysaskooda, sidoo kalena siineysa
sharaf, rajo iyo fursad.”
“Waxaan u rajeynayaa muwaadiniinta da’da yar inay shaqooyin ka helaan
dowladda iyo shirkadaha gaarka loo leeyahay, waxaana ku faraxsanahay
inaan ka soo qeybgalo xafladda qalinjebinta mid ka mid ah dufcooyinkii
ugu horreeyay ee Machadka Qamar”
Machadka Marxuumad Qamar
Machadka Horumarinta Haweenka ee Marxuumad Qamar waxaa la aasaasay 10kii
Diseember 2009kii, 7 maalin kaddib markii nin naftii-hallige ah uu
dilay 4 wasiir oo ay ka mid ahayd Allaha u naxariistee Qamar oo ahayd
wasiirkii caafimaadka. Ardeyda wax ka barata Machadka waxay dhan yihiin
401, kuwaasoo 92% ay gabdho yihiin. Waxyaabaha lagu barto Machadka waxaa
ka mid ah dugsi hoose, maamulka iyo maareynta, kumbuyuutar, farshaxan
iyo karinta cuntada.
Iyadoo machadku u dabbaal-degayo bisha Diseember sanadguuradiisii
koowaad, qalinjebinta ardeydan waxay marqaati u tahay waxqabadka
wasaaradda, isla markaana muujinaya awoodda ay wasaaradda u leedahay
inay ka qeybqaadato horumarka haweenka ee Soomaaliya.
Dhamaad
Wasaaradda Warfaafinta, Muqdisho