Dagaalo culus ayaa saacadihii u dambeeyay ka dhacay deegaano hoos taga degmada Ceelbuur ee Gobolka Galgaduud, iyadoo Xoogaga Al-Shabaab ay bilaabeen weeraro ku dhufo oo ka dhaqaaq ah oo ay ku qaadayeen Ciidamada Itoobiya ee AMISOM ka mid noqday.
Sida wararku sheegayaan dagaalyahano ka tirsan Shabaab ayaa jidka u galay kolonyo Ciidamada Itoobiya la socdeen oo marayay inta u dhaxeysa Ceel Qoxle iyo Ceelbuur, iyadoo halkaas uu ka dhacay dagaal xoogan, wararka ayaa sheegaya in Ciidamada huwanta ay ku wajahan yihiin Ceelbuur, iyagoo haatan u jira ilaa 30-KM, sida saraakiil ka tirsan dowladda ay u sheegeen qaar ka mid ah warbaahinta Muqdisho.
Afhayeenka howl galada Al-Shabaab Abuu Muscab ayaa sheegay in saacadihii la soo dhaafay ay deegaanada Galgaduud ku gubeen gaadiid ay la socdeen Ciidamada Itoobiya, isla markaana qasaare culus gaarsiiyeen.
Howl galada ka socda Galgaduud ayaa ku wajahan deegaanada Shabaab ka maamulaan bariga gobolkaas, iyadoo labadii maalmood ay la wareegeen deegaano dhowr ah.
Wariyaha aarannews.com Caaqil Dalmar