Faah faahin dheeraad ah oo ka soo baxeysa qaraxii xooganaa ee maanta gil gillay Isgoyska Km4

Faah faahin dheeraad ah ayaa waxay ka soo baxeysaa qarax xoogan oo maanta gil gillay Isgoyska km4 ee magaaladda Muqdisho, waxaana qaraxaasi loo-maleynayaa inay ka dambeysay Al Shabaab.
Nin watay gaari walxaha qarxa laga soo buuxiyay ayaa waxay Ciidamadda Dowladda Soomaaliya ay ku joojiyeen inta u dhaxeysa Safaaradii hore ee Masar iyo Shaneemo Ikwadoor ee Isgoyska KM4, waxaana ninkaasi lagu amray in gaarigaasi baaritaano lagu sameeyo.
Gaariga oo ay saarnaayeen walxaha qarxa ayaa wuxuu ninkaasi qarxiyay miino culus oo gaarigaasi saarneyd, isla-markaana waxaa ka dhashay khasaarooyin kala duwan oo soo kala gaaray Ciidamadda Dowladda Soomaaliya iyo dad rayid ah.
Qaraxaan oo si weyn looga maqlay magaaladda Muqdisho ayaa waxaa ku dhimatay in ka badan 4 ruux, iyadoo laba ka mid ah ay yihiin dad rayid ah, mid ka mid ahna uu yahay askari ka tirsan askarta Dowladda iyo midka kale oo isna ah kii wax-yaabaha qarxa watay.
Sidoo kale waxaa ka dhashay khasaarooyin kala duwan oo dhaawacyo ah, dhaawacyadu ayaa waxay sii caga-cageynayaan in ka badan 6 qof, iyadoo dhaawacyadu qaarkood ay yihiin kuwo aad u culus, shan ka mid ahna waa Ciidamadda Dowladda.
Dhanka kale goobta uu qaraxu ka dhacay ayaa waxaa soo gaaray ciidamo xoogan oo ka tirsan Dowladda iyo Amisom, waxayna baaritaano ay ku sameeyeen qaraxaasi, hase yeeshee weli kama aysan hadlin.
Shacabka ku dhaqan magaaladda Muqdisho ayaa waxay walaac xoogan ay ka muujiyeen qaraxyada waaweyn ee kusoo badanaaya magaaladda Muqdisho, wixii warar oo dheeraad ah kala soco Markacadey.net