Dhalinyaro Soomaaliyeed oo gabdho iyo wiilal isgu jira kana mid ah Soomaalida ku dhaqan dalka Mareykanka ayaa waxaa la soo taagayaa Maxkamad ku taal gobolka Tennessee si loogu qaado dacwad aad uga anfariirisay Soomaalida faraha badan ee carigaas ku dhaqan.
Cumar Jamaal, ergayga dowladda Soomaaliya u jooga Mareykanka oo BBC:da la hadlayay ayaa sheegay in dhalinayradan lagu soo oogay dacwad ku saabsan ka ganacsiga jirka gabdho yaryar oo Soomaali ah waxaana uu arintaas ka yiri; "Dacwaddan waxay ka timid magaalada Neshville ee gobolka Tennessee, waxaana lagu wadaa in dacwaddooda loo wareejiyo gobolkaas, si baaritaanno dheeraad ah loogu sameeyo,"
Mr. Jamaal oo hadalkiisi sii wata ayaa intaas ku daray in gabdhaha dhibbanaha ah ay xitaa ku jirto gabar sadex iyo toban jir ah (13) taasina waxay muujineysaa buu leeyahay sida arintu faraha uga baxday gudaha bulshada Soomaaliyeed ee Mareykanka uga yaabisay. "Gabdhaha dhibbanayaasha a ee jirkooda la iibiyay, waxaa ku jirta gabar 13-jir ah, runtiina waa jirtay nuxnuxda hoose ee ah in dhalinyarada Soomaaliyee ku nool Mareykanka ay halaabeen, balse tani waa arrinta walaaca sii kordhisay"
Dacwadan ayaa la filayaa in ay dhowaan si rasmi ah uga bilaabato halkaas waxaana diyaarsan baa la leeyahay marqaatiyaal badan oo maxkamada hortegaya si ay eedeysanayaashan ugu marqaati fureen.
Arrintan ayeey Soomaalida Mareykanku badankood ku tilmaameen mid ugub ah oo aad uga argagixsay waloow qaarkood sheegayaan in waxaani ay horay u jireen balse aysan sidan oo kale aysan shaaca uga qaadmin ama u soo tarmin.
