Al Shabaab ayaa magaalada Marka, xarunta gobolka Shabeellada Hoose dadka ku dhaqan u soo bandhigay meydad aad isu bedelay oo ka tirsanaa ciidamadii Burundi ee ku dhintay dagaalkii maalmo ka hor ka dhacay degmada Dayniile, magaalada Muqdisho.
Meydadkaas oo ay ku daadiyeen al Shabaabku wado dhexmarta magaalada Marko ayeey ugu talagaleen inay dadka halkaas ku dhaqan gaar ahaan dhalinyarada ku dhiirigeliyeen dagaalada ay ka wadaan Koonfurta Soomaaliya.
Sidoo kale al Shabaabku waxay reer Marka u soo bandhigeen filimaan ka hadlaya dagaalka iyo qaababka la isu qarxiyo, waxaana dadka la hadlay mas'uuliyiinta al Shabaab u qaabilsan dacwada iyo dagaal ku qalqaalinta.
Dhanka kale magaalada Marka waxay al Shabaabku ka fureen xafiiska ay ku diiwaangelinayaan dhalinyarada degmadaas ku dhaqan si ay uga qeybgeliyaan dagaalka ay ka wadaan Soomaaliya.
Reer Marka ayaa markii ugu horeysay oo ay arkeen meydadka AMISOM ku tilmaamay bandhig meydeedka ay al Shabaabku magaaladaas ka sameeyeen.