Nathan Mugisha, Taliyaha ciidamada AMISOM ee sheegta in ay nabad-ilaalin u oogaan Soomaaliya oo ka hadlayay munaasabad lagu maamuusayay maalinta nabadda Adduunka oo ka dhacday Dugisiga Tababarka Xalane ee magaalada Muqdisho ayaa xoogaga ka soo horjeeda ugu baaqay nabad iyo dagaal joojin si buu yiri ay ciidamadooda xabbada uga nastaan.
Taliyuhu wuxuu ku celceliyay in dagaal aan wax guul ah laga gaareyn isagoo dhanka kalena meesha ka saaray oo aad u dafiray duqeynta ay ciidamadiisu goobaha shacabku ku badan yahay ka geystaan gaar ahaan Suuqa Bakaaraha iyo deegaanada ku xeeran.
Nathan wuxuu ugu dambeyntii xoogaga ka soo horjeeda ugu baaqay in ay nabadda ka shaqeeyaan haddii nabad la helana aysan sii joogeyn ciidamadiisu dalka Soomaaliya oo sida ay sheegtaan Hawlo nabad ilaalineed u jooga Muqdisho.